Censo 2020 a huur computer servers local pa asina tur data keda na Aruba mes
ORANJESTAD (AAN): For di 1 di October te cu 10 di October, pueblo por cuminza participa na Censo 2020 y no mester warda e Tellernan bishita bo cas. Usando computer, bo por subi nan website y yena e dianan ey e cuestionario.
Loke ta importante ta cu e suplica grandi ta pa e participantenan yena e cuestionario na forma husto y corecto. Pues Censo ta spera cu bo ta contestando e berdad.
Segun Desiree Helder kende ta Director Interino di Oficina Central di Estadistica, e preguntanan tin di haya contesta confiable y corecto pa asina e data di e Census por wordo usa e proximo diez añanan.
Pesey ta wordo enfatiza cu e importancia di Censo ta esey, pues pa bo contribui cu e berdad. Corda bon cu esnan cu ta acumula e datonan aki lo no haya sa nunca kende bo ta, pasobra esey no ta e meta.
Corda cu e Organizadornan di Censo 2020 ta mara na ley di privacidad y ley di secrecia. Pues si cualkier informacion di ciudadano of compania sali afo, e trahadornan por haya boet of hasta castigo di prison. Esey ta inclui e Tellernan tambe.
Fuera di esey, Helder a splica cu di nan banda, a hasta percura cu e informacion di Censo 2020 lo keda local na Aruba! Tur informacion di data, lo wordo warda riba servers instala na Aruba mes.
Pues ningun data di Censo 2020 lo no bay wordo warda na servers na otro pais (ni Merca, ni Europa).
“Awor nos a haci tur esfuerzo pa e data digital tambe ta bon warda,” Helder a indica.
Nan ta haciendo uso di software tambe cu a demostra caba cu e ta uno confiable, y desde aña 2006 caba a test esaki. E software ta percura pa tur data colecta ta wordo warda na un server na Aruba.
Aki ta evita cu e data por cay den man di otro paisnan, unda via cualkier caso den Corte, ata tur dato di e isla ta cay den man di Gobierno stranhero.
Segun Helder, Oficina Central di Estadistica a huur servers na Aruba mes cu tin tur rekesito cu mester di dje pa tene data safe, pa sigura e privacidad di pueblo. Y ta solamente esnan encarga cu analisis di e data tin acceso na e servernan, y ningun hende mas.
Infoclips
Documentario di Censo
