Entrante 1 di October pueblo por yena Censo 2020 via sistema Online
Cuestionario mas simple y cortico e biaha aki
ORANJESTAD (AAN): Ora cu algun hende a kere cu e lo no socede mas, ata siman a habri cu e bunita noticia cu Censo 2020 lo sigui, y awor mas moderno cu nunca!
Esey ta loke Desiree Helder, kende ta Director Interino di Oficina Central di Estadistica a indica durante un conferencia di prensa.
Cada 10 aña ta organiza un Censo na Aruba pa asina haya un ‘moment opname’ di e isla. Sinembargo e pandemia di Coronavirus nobo y e situacion economico di e pais, a afecta e plannan pa Censo 2020.
Pesey decision final a ser tuma pa toch organiza Censo 2020 pa e aña aki, y e lo cuminza dia 1 di October venidero. Pero e organizadornan di e Censo a tene cuenta cu tur aspecto di seguridad pa tanto nan personal como tambe e ciudadanonan di e isla.
Helder a mustra cu pesey dia 1 di October lo no cuminza normal cu tellernan riba caya pasando di cas-pa-cas. Lo cuminza cu Censo 2020 via sistema Online.
El a splica cu dia 1 di October 2020, e formulario completo lo aparece riba nan website, y e ora tur hogar cu kier yena esaki por haci esey, y yena esey completo.
E hogarnan cu yena e Censo completo online, lo no wordo bishita despues. Pesey ta importante pa tur hende ta na altura di esaki, esta cu for di 1 October te cu 10 October e formulario ta disponible online, y bo por yena esaki usando e “Perceelnummer” cu WEB Aruba NV ta usa pa bo cas.
Tur cas na Aruba tin un meter di awa, pues tur hende tin un ‘Perceelnummer’, y esey ta loke Censo 2020 lo usa pa asina ta sigur cu tur hogar a wordo inclui den e conteo. Si acaso abo ta biba na un lugar unda no tin meter di awa y toch bo kier ta participe, e ora bo por yama Oficina Central Estadistica pa asina bo wordo inclui.
Helder a bisa cu e number di percela ey ta un identificacion ‘unico’ pa cada hogar cu tin meter di awa na Aruba. Bo tin di yena e number aki riba e website pa asina haya acceso na e cuestionario Online.
INOVACION DEN CENSO
Segun Desiree Helder, e sistema nobo aki di Censo 2020 ta un parti no solamente pa seguridad di tur hende, pero ta forma parti di e inovacion cu Oficina Central di Estadistica ta trahando duro riba dje ultimo añanan.
El a divulga cu for di hopi aña caba nan tabatin e deseo pa haci e encuesta di Censo 2020 bira uno completamente digital. Pero esey tabata destina pa e tellernan cana cu e.o. un Computer Tablet y ta yena e informacion.
Awor cu e pandemia a surgi, nan a dicidi pa bay un paso mas leu, y haci e Censo 2020 obtenible Online. Pasobra aworaki cu e crisis di Coronavirus, ta trece cune diferente complicacion pa hogarnan, unda tin problema pa laga hende straño drenta nan cas.
Di Maart pa awor, e organizadornan di Censo 2020 a haci un adaptacion completo riba e cuestionario, pa asina hacie posible y mas facil pa yena e informacion Online.
Desiree Helder a aclarea cu nan a simplifica e preguntanan, y hasta a kita algun di nan, pa asina e no bira un cuestionario cu ta dura hopi. Resultado di esey ta cu awor tin un cuestionario mas facil y cortico cu ta haci posible pa hende yene Online.
Toch e Director Interino di Oficina Central di Estadistica a mustra cu e no ta un cuestionario simple, y pesey den e periodo di 1 te cu 10 di October, e personal di Oficina lo ta disponible pa duna sosten, contesta telefon of email di hendenan cu tin pregunta, pa haya splicacion kizas di cierto pregunta. Pues e sosten lo tey pa cada ciudadano. Nan meta ta pa lo mas posible, haya tur informacion di Censo 2020 drenta online.
BISHITA NA NOVEMBER
Relaciona cu e reglanan di distanciamento social y reglanan sanitario, ta deseable pa tur hende yena e formulario di Censo 2020 via Online durante luna di October. Esey ta nan meta, pues pa mas hogar keda cla Online cu Censo 2020.
Pero toch nan sa cu lo tin algun hogar cu simplemente no por haci esey Online, y esey por ta debi na diferente motibo.
Pesey mes entrante 1 di November te cu 10 di November, tellernan lo subi caya pa asina bishita e hogarnan cu no a logra yena Censo 2020 ainda. Den pasado Aruba tabata usa como 1.200 teller pa cana rond di Aruba, y hopi biaha a haci uso di docentenan di scol.
Pa e aña aki kizas lo bay usa solamente 500 teller, y como cu den November ta dificil pa haya participacion di docente, nan ta spera di por haya teller cu kizas ta ambtenaar, of pensionado, of hende cu kizas no tin trabao. Pero tin rekesito minimo di e.o. MAVO diploma y bo mester por comunica na Papiamento, Hulandes, Ingles y Spaño sin problema.
Solamente e adresnan cu no a completa e cuestionario Online lo wordo bishita na November.
Corda cu ta importante pa cada 10 aña haya informacion nobo via di Censo. Specialmente awor cu tin e pandemia aki, ta deseable pa tin informacion fresco. E informacion lo bay contene detaye di e.o. cuanto hende ta bibando awor na Aruba, cuanto hende ta sin trabao, etc.
Censo 2020 mester di un conteo completo di tur hende na Aruba! Tur hende cu ta pensa di biba un aña of mas riba e isla, ta wordo conta! Y corda cu e informacionnan aki tur lo keda discreto. Pa ley, ta prohibi pa un teller di Censo 2020 bay leak informacion, y aki hasta castigo di prison ta colga riba nan cabez.
Infoclips
Documentario di Censo
