Hendenan sin trabao por busca chens pa bira Teller pa Censo 2020
ORANJESTAD (AAN): Aruba ta cla pa Censo 2020 y e biaha aki lo bay ta un proceso Online for di 1 te cu 10 di October, y despues for di 1 te cu 10 di November lo bay ta cu Tellers pasando di cas-pa-cas.
E organizadornan di Censo 2020, esta e funcionarionan di Oficina Central di Estadistica a traha duro riba tur e proceso aki.
Uno di nan ta Yarelyn Figaroa-Kelly, kende ta encarga cu e personal di Censo 2020. El a splica cu awor e Tellernan lo bay subi caya for di 1 te cu 10 di November. Antes tabata planea pa usa 1.200 Teller pa cana full rond di Aruba.
Pero awor cu ta bay haci e cuestionario Online, e cantidad di Teller a baha. Si acaso no ta tur hende a yena e Censo via sistema Online, e ora e organizadornan ta calculando cu kizas 500 Teller lo tin di bay subi caya y bishita cas-pa-cas.
Yarelyn Figaroa-Kelly ta haci un suplica pa esnan interesa pa haci e trabao di Teller, pa nan inscribi nan mes. Den pasado semper a haci hopi uso di docente, pero e biaha aki como cu e lo ta na November, e acceso pa nan ta dificil.
Toch ta haci un suplica pa Ambtenaar pone nan mes disponible, ya cu como Teller nan por haya ok tanten cu e Dienst mes permiti. Pensionado y esnan sin trabao tambe por inscribi.
Tin algun rekesito cu tin di tene cuenta cune si acaso bo bay inscribi pa bira Teller. Bo mester tin 18 aña di edad, mester ta residente di Aruba, bo mester tin rijbewijs valido, y bo mesun auto/transporte.
Bo mester por papia y lesa Papiamento, Ingles, Hulandes, y Spaño. Bo mester tin minimo un MAVO diploma, y bo tin di bay sigui entrenamento pa bira Teller. E training lo bay ta Online, pues lo no haci training den grupo grandi mas manera antes. Por haci pregunta na: census2020@cbs.aw
Ta exigi pa bo sigui full e Training pa asina bo por bira un Teller. Bo mester ta disponible den dia, atardi, anochi, y den weekend. Un suplica pa publico sigui inscribi, pasobra ainda no a yega na e cantidad di Teller.
Infoclips
Documentario di Censo
