Oficina Central di Estadistica ta pidi tur cas pa coopera cu Censo2020
ORANJESTAD (AAN)- Oficina Central di Estadistica ta informa e pueblo di Aruba cu falta solamente 3 siman pa Censo2020. Censo2020 lo start dia 1 di October proximo.
Manera ta conoci, un Censo ta un conteo general di poblacion y vivienda. Den otro palabra, durante e Censo nos ta conta tur persona cu, dia 1 di October, ta bibando na Aruba pa 1 aña of mas of tin e intencion di biba na Aruba pa 1 aña of mas.
Actualmente Aruba ta pasando door di un temporada dificil, pero net den e momentonan aki e ta di sumo importancia pa colecta datonan di e situacion real di hogarnan na Aruba. CBS kier a pidi tur ca pa coopera cu Censo 2020.
Censo2020 ta consisti di 2 parti:
1-10 di October 2020: Conteo Online
1-26 di November 2020: Conteo di hogarnan cu no a participa den e Conteo Online
Casnan por haya acceso na e cuestionario online door di bishita e website di Censo2020 www.census2020.aw y usa nan number di percela di WEB NV.
Mester tene debido cuenta cu e cuestionario di Censo mester wordo finaliza den 1 solo biaha. E number di percela di cada hogar tambe por wordo usa solamente 1 biaha.
Riba e website por lesa e cuestionario di Censo2020 pa asina un y tur ta na altura di e preguntanan y pa por prepara esakinan prome cu yena e cuestionario online.
Esaki lo facilita e yenamento di e cuestionario. Asina cu e website di Censo2020 ta activo lo anuncia esaki oficialmente.
Casnan cu no tin un number di percela di WEB por yama CBS pa haya un codigo individual pa haya acceso na e cuestionario. Personal di CBS lo ta disponibel via whatsapp of telefoon via. E number lo ta activo entrante 1 di october. Tambe por manda un
e-mail na census2020@cbs.aw pa yuda esnan cu ta yena e cuestionario online. E e-mail aki ta activo caba.
CBS kier uza e oportunidad aki pa encurasha tur cas na Aruba pa coopera cu Censo2020 y yena e cuestionario di Censo online.
Infoclips
Documentario di Censo
