Pakico un Censo?
KICO TA UN CENSO?
Un Censo ta un conteo general di poblacion y vivienda y ta wordo teni cada 10 aña segun principionan y recomendacionnan di Nacionan Uni. Durante di un Censo ta conta tur persona cu, riba un momento specifico den tempo (e momento di Censo), ta bibando na Aruba pa 1 aña of mas of tin e intencion di keda biba na Aruba pa un aña of mas. E aña aki, e momento di Censo lo ta diahuebs 1 di oktober 12:00 di marduga.
E aña aki, Oficina Central di Estadistica (CBS) ta organiza e di 6 Censo di Poblacion y Vivienda na Aruba.
PAKICO UN CENSO?
E meta principal di e Censo ta pa colecta datonan detaya, confiabel y di calidad halto pa por haya un bista di e desaroyonan cu a tuma lugar den nos poblacion den transcuro di e ultimo 10 aña. Datonan colecta durante di un Censo ta duna contesta riba cuatro pregunta cardinal: Ken nos ta, Cuanto nos ta, Unda nos ta biba y Con nos ta biba.
E Censo ta wordo organisa pa haya sa e cantidad exacto di habitante y vivienda y alabes pa haña un bista detaya di e caracteristicanan social y demografico di nos poblacion, manera edad, sexo, composicion di hogar, estado di salud y nivel di educacion.
Censo ta hopi importante pa nos pueblo, ya cu e datonan colecta ta yuda guia sector publico y priva, pa por planea a base di situacionnan real y actual den nos comunidad. Y alabez cu e cifranan actual bo por compara cu Censonan anterior.
Door di contribui na e Censo tur persona bibando na Aruba ta haya e oportunidad pa contribui na nan mesun bienestar, e bienestar di nan famia y tambe na e bienestar di henter nos comunidad.
KEN TA WORDO CONTA DURANTE DI E CENSO?
Un Censo por wordo compara cu un portret cu ta wordo saca di e habitantenan di Aruba. Tur esnan cu na e momento di saca e potret ta riba e potret ta wordo conta. Censo ta un conteo completo di un momento specifico den tempo di nos pais.
Tur persona cu ta biba 1 aña of mas na Aruba of tin e intencion di keda biba na Aruba pa 1 aña of mas lo wordo conta. Esaki ta conta pa tur hende sin tene cuenta nan estado legal. Esnan cu na momento di saca e potret ta den exterior pa motivo di vacacion of medico, tambe mester wordo conta.
Tur persona cu ta forma parti di nos comunidad, incluyendo esnan cu ta biba den institucionnan manera por ehempel casnan di cuido pa nos grandinan, como tambe esnan cu ta den KIA y esnan cu no tin lugar di biba, lo wordo conta.
Tur habitante di nos pais ta haya e chens di wordo inclui den e potret aki y pa asina por contribui na e bienestar di nos pais, BO PAIS.
KIKO TA WORDO PUNTRA?
E cuestionario di e Censo ta basa riba recomendacionan di Nacionnan Uni y ta contene topiconan cu pa Aruba ta actual y relevante. E preguntanan ta standarisa locual ta hasi posibel cu datonan colecta durante Censo 2020 por wordo compara cu e Censonan anterior y tambe cu Censonan cu ta wordo teni na otro paisnan na mundo.
E cuestionario di e Censo ta consisti di 3 parti principal: preguntanan tocante e composicion di e hogar, e caracteristicanan di e vivienda y e caracteristicanan di cada persona den e hogar. Preguntanan tocante migracion, salud, educacion, labor y entrada mester wordo yena pa cada persona den e hogar pa asina por haya un bista completo di tur persona bibando den hogarnan na Aruba.
Tur pregunta hasi durante di e Censo tin como meta pa duna contesta riba e cuatro preguntanan cardinal: Ken nos ta, Cuanto nos ta, Unda nos ta biba y Con nos ta biba. Solamente cu bo cooperacion, nos por contesta e preguntanan aki.
PREGUNTANAN TOCANTE VIVIENDA
Na unda nos ta biba y con nos ta biba? Ta importante pa haya un bista di e caracteristicanan di e viviendanan den cual hogarnan na Aruba ta biba. Por ehempel e cantidad di camber, e cantidad di baño y si e vivienda tin acceso na facilidadnan basico.
E cantidad di camber den un vivienda dividi door di e cantidad di persona cu ta biba den e vivienda ta indica por ehempel si e espacio cu e hogar ta biba aden ta adecua of limita. E calculacion aki ta parti di e asina jama “Better Life Index” of “Indice pa un Bida Miho”. Pa mas informacion bishita: http://www.oecdbetterlifeindex.org/
Pa entre otro por calcula e “Indice pa un Bida Miho” e cuestionario di e Censo ta inclui pregunta di e sorto di vivienda den cual hogarnan ta biba, por ehempel si e ta un cas, un apartamento of un otro sorto di vivienda. Tambe ta puntra si e vivienda ta e propiedad di e hogar of e ta na huur y cuanto tempo e hogar tin ta biba den e vivienda.
Otro preguntanan inclui den e cuestionario di e Censo ta e superficie total di e vivienda, si tin un cushina of un otro lugar pa cushina, si tin conexion di awa, coriente, telefoon y cable, y si e conexionnan aki ta habri.
E preguntanan aki ta esencial pa duna un bista completo di e caracteristicanan di viviendanan na Aruba. Durante di e escohencia di e preguntanan aki a tene na cuenta e recomendacionnan di Nacionnan Uni (UN) pa locual ta trata e preguntanan clave cu mester wordo inclui den e cuestionario di un Censo. Pa mas informacion, download e publicacion mas recien na: https://unstats.un.org/unsd/demographic-social/
Pa por tuma mihor decisionnan basa riba datonan actual e informacion di bo vivienda ta importante.
PREGUNTANAN TOCANTE COMPOSICION DI HOGAR
Ken nos ta y cuanto nos ta? Cambionan den e structura di e poblacion di Aruba y e composicion di hogarnan na Aruba ta hunga un rol importante den e bienestar economico y social di nos pais.
Pa por determina e composicion di e hogar mester identifica e relacion entre e personanan den e hogar. Pa e motibo aki ta puntra si tur persona den e hogar ta famia di otro, tambe door di matrimonio. Tambe ta puntra si e mama y e tata di e personanan den e hogar ta biba den e hogar y si e personanan ta biba cu un pareha riba un base duradero, sea casa of no casa. Tambe ta puntra e estado civil di cada persona cu ta 14 aña pariba.
Den e cuestionario di e Censo ta puntra tambe pa e sexo, edad, fecha di nacemento, pais di nacemento, y nacionalidad di cada persona den e hogar.
Tur e preguntanan aki hunto ta hasi cu CBS por determina e composicion di cada hogar na Aruba y tambe e structura di nos poblacion den edad, sexo y desendencia.
E preguntanan aki ta esencial pa por sigui di serca e desaroyonan social y demografico cu a tuma lugar na Aruba den e ultimo 10 aña y pa haci projeccionnan di e poblacion pa e proximo 20 aña. Pa mas informacion por download e siguiente publicacionnan:
PREGUNTANAN TOCANTE ESTADO DI MIGRACION
E poblacion di Aruba ta uno multicultural. E ta un mescla di personan cu ta bin for di diferente pais y cu tin diferente nacionalidad. Na Censo 2010 e poblacion tabata consisti di personanan procedente di 133 diferente pais y cu 96 diferente nacionalidad. Di esnan naci na Aruba, un tercera parti tabata tin por lo menos 1 mayor cu a nace den exterior.
Durante 10 aña a bin diferente desaroyo no solamente na Aruba si no tambe na otro paisnan na mundo cu tin un impacto riba e migracion pa y for di Aruba.
Cuanto persona naci na Aruba ta keda biba henter nan bida na Aruba? Cuanto ta bay y ta bin bek? Con largo un persona cu no ta naci na Aruba ta keda biba na Aruba? Esakinan ta preguntanan cu por wordo contesta cu e datonan colecta durante di e Censo.
Preguntanan tocante desendencia ta duna nos e oportunidad pa midi e diversidad cultural di nos poblacion. Bo kier haya sa mas? Coopera cu Censo.
PREGUNTANAN TOCANTE SALUD
E cuestionario di e Censo tambe ta contene preguntanan tocante salud general, limitacionnan físico y mental y necesidad di cuido. E preguntanan aki ta esencial ya cu, por ehempel, no tin fuente administrativo pa por determina cuanto hende na Aruba ta sufri di limitacionnan físico of mental. Den e caso aki, cada 10 aña e Censo ta brinda e oportunidad pa haya un bista detaya di personanan cu limitacion.
E preguntanan aki ta forma parti di e lista di preguntanan recomenda pa Nacionnan Uni (UN) y pa e “Washington Group on Disability Statistics” (http://www.washingtongroup-disability.com/).
E Censo tambe ta duna un bista completo di e cantidad di personanan cu mester di cuido y kizas no ta ricibi esaki. E ta sumamente importante pa haya sa mas di e gruponan vulnerabel aki den nos comunidad pa asina por brindanan e cuido y sosten cu nan merece.
PREGUNTANAN TOCANTE EDUCACION
Pakiko preguntanan tocante educacion? Durante di e Censo nos ta hasi 2 pregunta importante di educacion. Uno ta dirigi na esnan cu ta bayendo scol y e otro ta pa por midi e nivel mas halto di educacion di nos pueblo.
Educacion ta un di e temanan principal den e Censo ya cu educacion ta na e centro di e dasaroyo di un pais. Un pueblo bon educa ta forma e rikesa mas grandi di un pais.
Pa e motibo aki, e preguntanan di educacion ta dirigi na tur esnan cu ta bayendo un scol of cu ta siguiendo un educacion, incluyendo e baby di mas chikito cu ta bishita un creche, muchanan y hobennan cu ta bayendo un scol parti mainta, atardi of anochi y esnan cu ta sigui un educacion online.
Tambe nos ta colecta informacion valioso di e nivel di educacion di mas halto di nos poblacion, incluyendo di esnan cu ta forma parti di nos forza laboral. Cu e datonan aki, por determina den cual ramonan di estudio nos tin suficiente persona bon educa y den cual ramonan falta conocemento. E informacion aki ta yuda stipula maneho pa por yega na un pueblo bon educa cu por carga e desaroyo economico di nos pais pa e añanan nos dilanti.
E preguntanan di educacion a wordo selecciona a base di recomendacionnan di Nacionnan Uni (UN) y di UNESCO. Pa mas informacion, download e recomendacionnan di Nacionnan Uni: https://unstats.un.org/unsd/demographic-social/Standards-and-Methods/files/ of bishita e website di UNESCO: http://uis.unesco.org/
PREGUNTANAN TOCANTE UZO DI ICT
Pakiko preguntan di uzo di technologia den un Censo? Technologia por mehora e calidad di bida di ser humano ya cu e por wordo uza como medio pa siña y educa, pa keda den contacto cu otro y pa duna y ricibi informacion. Mirando e rapidez di e desaroyonan den e mundo technologico, e ta hopi importante pa midi e desaroyonan cu ta tuma lugar na Aruba riba e tereno aki.
Den e cuestionario di e Censo nos a inclui preguntanan tocante e acceso na internet, e uzo di internet pa scol y pa trabao y e acceso na aparatonan cu ta wordo uza pa bay online. E datonan aki ta cada biaha mas importante, sigur si tene na cuenta cu e COVID-19 a forza nos pa bay mas y mas den direccion di haci trabaonan online y for di cas y tambe sigui lesnan di scol online.
E preguntanan di ICT inclui den e cuestionario di Censo 2020 tin tambe como meta pa calcula indicadornan di e Union di Telecomunicacion Internacional (ITU). Pa mas informacion, bishita: https://www.itu.int/en/ITU-D/Statistics/Pages/publications/wtid.aspx
PREGUNTANAN TOCANTE LABOR Y ESTADO DI EMPLEO
Fuera di e pregunta “Cuanto nos ta” tin e necesidad di contesta e pregunta “Ken nos ta” den termino di por ehempel edad, sexo, educacion y tambe estado di empleo. Pa e motibo aki, durante di e Censo, nos ta puntra tur persona di 14 aña pariba si nan a traha den e siman prome cu e Censo of no.
Na esnan cu a traha, nos ta puntra e tipo di trabao cu nan a eherce como tambe e nomber y ubicacion di e negoshi, compania of instancia na unda nan a traha. Di e forma aki nos por haya un bista completo di e forza laboral di Aruba como tambe di e distribucion di ocupacionan y industrianan na Aruba.
Na esnan cu no a traha, nos ta puntra si nan ta buscando trabao y tambe cual ta e motibonan principal pa nan ta sin trabao. Di e forma aki nos por haya un bista tambe di e magnitud di e situacion di desempleo na Aruba como tambe di esnan cu pa un motibo of otro no ta activo riba nos mercado laboral.
Datonan di nos forza laboral ta sumamente importante ya cu e ta duna un bista di e desaroyonan economico y social di nos pais.
E preguntanan di labor inclui den e cuestionario di Censo 2020 ta sigui e standard internacional di e Organisacion Internacional di Labor (ILO). Pa mas informacion, bishita: https://www.ilo.org/global/standards/introduction-to-international-labour-standards/lang–en/index.htm
PREGUNTANAN TOCANTE ENTRADA
Un di e metanan principal di un Censo ta pa colecta datonan detaya di e situacion socio-economico di personanan y hogarnan na Aruba. Pa haci esaki posibel, e formulario di Censo 2020 ta inclui preguntanan riba e entrada cu cada persona den e hogar ta ricibi, sea for di su trabao principal of for di otro fuente di entrada. E datonan aki ta yuda determina e estado di bienestar economico como tambe e estado di pobresa di hogarnan na Aruba.
Datonan di e situacion socio-economico actual di nos poblacion ta esencial.
Pa mas informacion riba con pa uza e data tocante entrada pa calcula e situacion di vivienda socio-economico, bishita e siguiente websites nan:
of download e siguiente publicacion:
Pakico un Censo?
Infoclips
Documentario di Censo
