Pueblo lo tin acceso na videos y tambe checklist prome cu nan participa den Censo 2020 Online
ORANJESTAD (AAN): Ora hopi hende a pensa cu kizas lo no tin Censo 2020 mas e aña aki, pa sorpresa ata e organizadornan a revela e siman aki cu esaki lo sigui pero den dos fase.
E prome fase ta duna hende chens di yena e cuestionario Online. Esnan cu no logra esey, tin di warda den di dos fase pa haya bishita di Teller na bo cas.
Durante un conferencia di prensa teni Dialuna atardi, Damara Rasmijn di Oficina Central di Estadistica cu ta encarga cu publicidad pa Censo 2020, a splica cu aña pasa ora nan a haci un Pilot Census, a haya hopi feedback di e casnan cu a pasa test, y tambe di e Tellernan. Asina a haya sa di e preocupacionnan cu tabatin durante di e prueba di e habitantenan, y di e tellernan.
A tene un sesion pa haya reaccion di e Tellernan, pa asina haya sa di nan cualkier preocupacion cu nan por tabatin ora di a bishita e casnan. Segun Rasmijn, tur e feedback aki nan a tene cuenta cune awor cu Censo 2020 ta bay cuminza.
Uno di nan tabata e reclamo cu “no tabatin suficiente informacion”. Riba esey, segun Damara Rasmijn, nan ta trahando hopi duro riba esaki. E ta un punto cu pueblo mes a trece dilanti, y tambe di e temanan.
Pesey awor e organizadornan di Censo 2020 ta trahando riba diferente video cu lo duna splicacion mas amplio di e temanan cu ta ser comenta riba dje den e cuestionario. Awor ora cu bo bay yena e cuestionario Online, bo por check e videonan si acaso bo keda pega.
“Esey ta e idea pa dunabo mas informacion cu bo mes por hacie sin ningun problema,” Damara Rasmijn a indica.
Fuera di esey, e organizadornan ta trahando riba un “Checklist” pa pueblo sa di antemano kico nan tin mester den nan poder tin adelanta prome cu nan bay haci e cuestionario Online, of na November prome cu e Teller yega bo cas.
E Checklist ta yudabo pasa mas facil den e cuestionario tambe.
En general, tur hende cu ta bay yena e cuestionario di Censo 2020 na cas via Online, lo bay haya un guia con pa cana e proceso, esta con pa log-in, unda pa yena e perceelnummer di WEB Aruba NV, etc. Ademas, si bo keda pega un caminda, lo bay tin trahadornan di Censo desde 1 di October te cu 10 di October pa asina contesta yamada of email pa yuda.
TUR ADRES
Esnan cu no por yena nan cuestionario Online, lo tin di warda pa 1 di November te cu 10 di November ora cu ta bay tin Tellernan riba caya bishitando cas-pa-cas di esnan cu no a haci esaki Online.
Nan lo bay bishita tur cas cu ta den database di adres, y tambe cu ta registra cu un perceelnummer di WEB Aruba NV. Esey ta debi cu e pensamento tey cu tur cas na Aruba ta conecta riba meter di e compania di awa.
Si acaso toch tin hende na Aruba cu no tin perceelnummer y toch kier participa, nan por yama Oficina Central di Estadistica pa asina pidi pa wordo inclui.
Infoclips
Documentario di Censo
