Ta importante pa Aruba tin dato corecto y actual di poblacion y esey ta bin danki na Censo 2020
ORANJESTAD (AAN): Oficina Central di Estadistica a tuma un paso grandi pa drenta den mundo digital cu Censo 2020. Y for di 1 di October te cu 10 di October venidero, pueblo tin chens di yena e cuestionario aki via sistema Online.
Bo mester tin djis bo Perceelnummer di WEB Aruba NV pa asina bo por haya acceso na e Censo pa bo hogar.
Desiree Helder kende ta Director Interino di Oficina Central di Estadistica, a splica cu un Censo ta necesario, como cu Aruba mester di un conteo completo.
Tur hende cu ta bibando na Aruba riba 1 October 2020, mester worde conta! Pasobra un censo ta un ‘moment opname’, y tur vivienda y hende na Aruba ta worde conta. Sin cooperacion di publico lo no tin un censo completo.
E organizadornan di nan banda a haci tur nan esfuerzo pa haci e Censo 2020 bira mas facil, no obstante tur e complicacionnan cu tin aworaki, toch pa asina logra haya data nobo, veridico, actual, y puntual di Aruba. Y esey ta e esencia di e Censo 2020.
Solamente ora di contribui cu Censo 2020, ta haya sa exactamente kico ta pasando cu Aruba, y di e forma ey por planea pa futuro, e.o. contribui cu Sustainable Development Goals (SDG) pa Aruba.
Y esey por worde logra solamente si bo tin dato veridico, actual y cu bo por confia riba nan. Cu nan so bo por aplica y traha pa bo futuro sostenible, no djis cu bo como persona, pero pa e pais en general.
No ta asina cu e cuestionario di Censo 2020 ta facil, y pesey mes dentro di poco lo aparece algun video y imagennan informativo pa informa pueblo kico ta e importancia di Censo, y con nan por coopera y con nan por prepara pa yena e cuestionario.
E organizadornan ta preparando un programa di TV tambe pa duna tur informacion necesario pa tur hende sa cu Censo ta yegando, y kico nan tin di prepara cune pa ora cu nan cuminza cu e cuestionario.
E situacion economico di Gobierno no ta permiti cu Oficina Central di Estadistica por hiba un campaña di publicidad pa promove Censo 2020. E speranza tey cu lo haya sosten di prensa pa pueblo ta al tanto di esaki.
Esnan cu no por yena nan Censo 2020 via sistema Online, lo tin di spera bishita di un Teller entre 1 November y 10 di November e ora.
Pues, e biaha aki pa 2 luna largo nan lo ta ocupa ta recolecta informacion pa Censo 2020.
Infoclips
Documentario di Censo
