Tocante

Un CENSO di Poblacion y Vivienda ta wordo ehecuta cada 10 aña door di Oficina Central di Estadistica (CBS) y e ta un conteo di tur persona y vivienda na Aruba riba un momento den tempo. Esaki ta e asina jama “Momento di Censo”. E aña aki e “Momento di Censo” ta cay riba diahuebs 1 di oktober 12:00 di marduga. Tur persona cu na e “Momento di e Censo” ta biba na Aruba pa 1 aña of mas of tin e intencion di keda biba na Aruba pa 1 aña of mas ta wordo conta. Tambe tur vivienda na Aruba ta wordo conta.

E meta principal di e Censo ta pa duna contesta riba 4 pregunta principal:

1. Ken nos ta?
2. Cuanto nos ta?
3. Con nos ta biba?
4. Na unda nos ta biba?

KEN NOS TA?

Informacion tocante e capital humano di un pais ta esencial pa por midi e bienestar y e progreso di un pais. Den e cuadra aki e ta sumamente importante pa haya informacion confiabel y detaya di e poblacion di un pais. Durante di un Censo, datonan ta wordo colecta di entre otro e sexo, edad, situacion migratorio, estado di salud, nivel di educacion y e situacion laboral di esnan cu ta forma parti di e poblacion. Di e manera aki e Censo ta haci posibel pa duna un descripcion detaya di e capital humano di nos pais y contesta e pregunta “Ken nos ta”, Si compara e datonan cu a wordo colecta durante di e diferente Censonan cu a tuma lugar na Aruba desde 1960, por haya tambe un contesta riba e preguntanan “Ken nos tabata” y “Ken nos lo ta”.

CUANTO NOS TA?

Un Censo ta un conteo di poblacion y vivienda. E meta principal di un Censo ta pa haci un conteo completo di tur persona y vivienda na un pais. Na Aruba, un conteo ‘de jure’ ta wordo haci. Esaki ta nifica cu tur persona cu ta residencia usualmente na Aruba ta wordo conta. E contesta riba e pregunta “Cuanto nos ta” ta esencial pa maneho, planificacion y administracion nacional. E ta necesario pa tin informacion confiabel y detaya di, entre otro, e grandura di e poblacion pa por planifica y implementa maneho economico y social na un manera apropia y riba un base sostenibel, lagando ningun persona atras. Censonan di poblacion tambe ta forma e base pa projeccionnan di poblacion cu ta esencial pa guia maneho riba termino largo.

CON NOS TA BIBA?

E areglonan cu personanan y hogarnan ta haci pa locual ta trata nan vivienda, ta varia tanto entre paisnan como tambe denter di paisnan y regionnan. Informacion cu ta regarda e areglonan cu personanan y hogarnan ta haci pa nan vivienda, den sentido di e acceso cu nan tin na awa, coriente y internet y e presencia di facilidadnan esencial, manera facilidadnan sanitario, ta esencial pa por monitorea aspectonan importante relata na e salud y bienestar di e personanan y hogarnan aki. E Censo di Poblacion y Vivienda ta provee informacion hopi balioso di “Con nos ta biba”. E informacion aki por wordo usa door di esnan encarga cu maneho pa nan por tuma na nan encargo e necesidadnan di personanan y hogarnan y monitorea e progreso cu a wordo obteni den transcurso di tempo pa e Metanan di Desaroyo sostenibel cu a wordo reconoci mundialmente.

UNDA NOS TA BIBA?

Nacionnan Uni na 2017 a defini e meta di e Censo di Poblacion y Vivienda como lo siguiente: pa colecta, procesa y disemina estadisticanan di poblacion, e composicion di e poblacion y su caracteristicanan y e distribucion y organisacion di famia y hogarnan riba un forma detaya y pa areanan chikito. Di e forma aki, e Censo ta provee datonan detaya di “Unda nos ta biba”, E datonan aki ta esencial pa esnan encarga cu maneho por aloca servicionan na unda tin mester di nan. E pregunta “Unda nos ta biba” tin un significancia agrega na momento cu datonan colecta durante di e diferente Censonan ta wordo compara cu otro den transcurso di tempo. E movecion geografico di e poblacion ta sigui patronchinan cla di e desaroyo economico di Aruba.